كـثرت مــعاذيــرك

كثرت معاذيـرك ولاعـاد يمديـك
ترجّع اللـي كـان بينـك وبينـي

ياما تحملتك علـى كثـر مافيـك
واللي بقى بالقلب!! جرحٍ يبينـي

صحيح كنت اهواك بالحيل واغليك
حتى ان حبك صار منـي وفينـي

تعبت لجل ارضي غرورك واداريك
جافيت لجل ارضيك نومي بعينـي

ياخي حرام تعنّـي اللـي مخلّيـك
خشير عمره من يسـار ويمينـي

الله يعينك ما بقى الا اني اسقيـك
من نفس كاسك تشربه من يديني

عند الكرامه لا تجي تنشد اشفيـك
اعز نفسي عنك وانسـى تجينـي

بليتني بالحب وابشر بـي ابليـك
دينٍ علـي وجـاك ردي لدينـي

بعتك بلاش وليه تطلبني اشريـك
من عادتي لا بعت غمضت عينـي

كثرت معاذيـرك ولاعـاد يمديـك
ترجّع اللي "كـان" بينـك وبينـي